MAJI YA SERENGETI YAVUTIA WATALII HIFADHI YA TAIFA

Na Bigambo Jeje, Musoma.

Kiwanda cha kusindika maziwa na maji cha Mara Dairy kilichopo mjini Musoma mkoani Mara  kimeanza kujipanga kukabiliana na ushindani wa soko la maji ya kunywa katika nchi za Jumuiya ya Afrika Mashariki kwa kuendelea kuzalisha bidhaa bora sanjari na kutumia bidhaa za kiwanda hicho kutangaza  vivutio vya utalii vilivyopo hapa nchini.

Moja ya mkakati ulioanzishwa na kiwanda hicho katika kukabiliana na ushindani wa soko la bidhaa hiyo katika nchi za EAC ni kubadili jina la maji toka Super Water na kuwa Serengeti ambayo ni moja ya hifadhi kubwa ya wanyama katika bara la Afrika na iko kwenye maajabu saba duniani.

Mkurugenzi Mtendaji wa kiwanda hicho cha Mara Dairy James Mathayo anasema wamefikia uamuzi huo kubadili jina toka SupperWater hadi Serengeti kwa sababu kadhaa ikiwemo hiyo ya kuukabili ushindani baada ya soko la bidhaa hiyo kuanza kudorola ndani ya kipindi cha takribani miaka 5 iliyopita.

“ Tulipoanza kusindika maji yalikuwa na rangi ya kijani hivyo kutokana na hali ya kisiasa hapa kwetu mkoani Mara walianza kuyaita maji ya Chama cha CCM na hatua hiyo kusababisha soko kushuka kwa kiasi kikubwa na ndipo mwaka wa jana wa 2015 tukaamua kubadili jina na kuyaita Serengeti,” Anasema.

Mathayo anasema uamuzi huo sasa una faida kubwa katika kukuza utalii na uchumi wa nchi kwa vile maji hayo yanatangaza hifadhi ya wanyama ya Serengeti kwa watalii na wageni toka nchi mbalimbali duniani wanaoitembelea hifadhi hiyo kwa shughuli za utalii unaoliingizia serikali pato la watani dola bilioni mbili kwa mwaka sawa na zaidi ya sh bilioni 4 .

Anasema maji hayo ya Serengeti sasa yana mwitikio mkubwa wa soko ambapo idadi kubwa ya watalii wanaotembelea hifadhi hiyo wameonekana kuyapenda sana kutokana na kuwa na jina sawa na hifadhi ya Serengeti sanjari na bia ya Serengeti inayouzwa kwa wingi hifadhini humo.

Anasema mbali na uzalishaji wa maji ya Serengeti, kiwanda chake pia kwa muda wa miaka mingi kimekuwa kikizalisha na kusindika maziwa ya Mara ambayo yamejizolea soko katia nchi za Tanzania na Kenya kutokana na ubora wake hususani maziwa ya mgando aina ya Yogurt yanayotokana na ng’ombe wa asili toka wilaya za Musoma,Butiama,Bunda,Tarime,Rorya na Serengeti.

Mkurugenzi huyo Mtendaji huyo wa kiwanda hicho anatabaisha kwamba kutokana na uzalishaji unaofanywa na viwanda vingi vya bidhaa za hapa nchini na kuuzwa katika soko lenye ushindani la Jumuiya ya Afrika Mashariki kunaondoa dhana potofu iliyojengeka kwa baadhi ya wafanyabishara toka nchi wanachama kuwa Tanzania haina cha kuuza katika soko hilo.

“ Si kweli kwamba Tanzania haina cha kuuza na kwamba imekuwa dampo kwa bidhaa za nchi wanachama, kwa mfano katika kipindi cha mwaka 2010 mauzo ya bidhaa zetu za hapa nchini yaliongezeka hadi kufikia dola za Kimarekani milioni 462.7 kutoka dola za Kimarekani milioni 285.0 mwaka 2009, sasa anawezaje kusema kuwa nchi yetu ni dampo?” anasema na kuongeza kuwa,

“ Ongezeko hilo lilikuwa ni sawa na asilimia 62.3. na  kwa miaka ya karibuni mauzo hayo yamezidi kuongezeka kwa kasi. Kenya imeendelea kuwa soko kubwa kwa bidhaa za Tanzania ikiwa inachukua asilimia 60.6 ya mauzo yote ya bidhaa za hapa nchini ndani ya Jumuiya hiyo hukubaadhi ya bidhaa zilizouzwa kwa wingi kutoka Tanzania kwenda Kenya kwa kipindi hicho kuwa ni pamoja na vyandarua, bidhaa za plastiki, chai, transfoma, karatasi na bidhaa za karatasi”.

Mathayo anasema si kweli kuwa Tanzania ni dampo katika soko hilo kwa vile anakumbuka katika kipindi hicho cha miaka mitano iliyopita bidhaa nyingine zilizouzwa katika nchi za Jumuiya ya Afrika Mashariki ni mbolea, saruji, mchele, chuma, samaki, ngano, sukari na nguo.Vile vile Urari wa biashara uliimarika kutoka nakisi ya Dola za Kimarekani milioni 31.9 mwaka 2009 hadi kufikia urari chanya wa Dola za Kimarekani milioni 168.8 katika mwaka 2010.

Anafafanua kuwa takwimu za mwaka 2011 zinaonesha Tanzania ilikuwa na urari chanya wa dola za Kimarekani milioni 30.9 hivyo tokea mwaka 2009 ambapo biashara ya Tanzania ilishuka kutokana na mtikisiko wa uchumi duniani, bado iliendelea kupanda kwa kipindi cha miaka miwili mfululizo kati ya 2010 na  2011.

Akizungumzia soko la maji ya Serengeti ukilinganisha na soko hilo kwa nchi jirani kwa kuzingatia itifaki ya soko la forodha la EAC hasa kwa wazawa, Mathayo anasema kwa sasa hali ya soko ni nzuri tofauti na hapo awali kwani kwa sasa ulipaji wa ushuru upo sawa na wanaoingiza ambapo zamani bidhaa toka nje ya nchi hazikuwa zinalipiwa ushuru hivyo wawekezaji wa ndani hawakupata faida nzuri na soko lilikuwa kidogo tofauti na hivi sasa.

“ Hatua hii imetusaidia kukabiliana na ushindani wa soko kwa kuwa wawekezaji wa nje sasa wanalazimika kulipa ushuru kwenye nchi zao na kulipa tena wanapoingiza bidhaa hizo hapa nchini kwetu, hivyo kwa kufanya hivyo wamejikuta wakiiongiza bidhaa mbalimbali yakiwemo maji kwa kiwango kidogo kutokana na kulipa ushuru mara mbili na kutuachia nafasi kubwa la soko” anasema.

Anaelezea tofauti ya uzalishaji ulivyokuwa wakati maji ya kiwanda hicho yakiitwa Super na sasa yanapoitwa Serengeti kwamba uzalishaji kipindi kile ulikuwa mkubwa sana lakini soko halikuwepo tofauti na kipindi hiki ambapo uzalishaji umepungua lakini soko liko juu sana ukilinganishwa na hapo zamani.

Anaeleza sababu za kushuka kwa kiwango cha uzalishaji wa maji kiwandani umetokana na kupungua kwa nguvu ya mitambo iliyotengenezwa nchini China na sasa wanampango wa kuagiza mitambo mipya toka nchini India ambayo ina uwezo mkubwa wa kuzalisha maji hivyo hatua hiyo itaongeza kukua kwa soko la maji ya Serengeti kwa ndani na nje ya nchi.

Mathayo anasema maji hayo wakati yakiitwa Super Water kiwanda kilizalisha wastani wa lita 1500 kwa saa lakini hali ni tofauti kawa sasa amapo uzalishaji ni wastani wa kati lita 600 hadi 800 kwa saa huku mpango wa kiwanda ukiwa ni kuagiza mitambo itakayozalisha lita 5000 kwa saa moja.

Kwa upande mwingine Mathayo anaeleza sababu za kiwanda chake kutumia maji ya visima kuzalisha na kusindika maji ya Serengeti badala ya maji ya Ziwa Victoria na anasema mtazamo wa watumiaji wengi ni kwamba maji ya ziwa ni maji machafu yenye mizoga na hayafai kunyweka na kwa msingi huo waliona watumie maji ya chanzo chao kikuu ambacho ni kisima kirefu cha kuchimbwa japo ukweli ni kwamba maji ya ziwa ni safi na hayana chumvi kama wengi wanavyodai.

Anatoa mfano hai wa maji ya Ruwenzori ya nchini Uganda kwamba yanatokana na maji ya Ziwa lakini kwa sababu yanaingizwa ndani ya nchi yetu wananchi na ambao ndiyo wateja wa bidhaa ya maji hawawezi kufuatilia na kuzingatia sana suala hilo kwa kuwa yanatoka nchini Uganda lakini ukweli ni kwamba hayatoki mlima Ruwenzori kama wanavyodhani watu wengi.

Baadhi ya watalii waliotembelea hifadhi ya wanyama ya Serengeti hivi karibuni kabla ya kuondoka kurudi kwao nchini Hispania wanaeelezea jinsi gani walivyofurahishwa na utalii wao ndani ya hifadhi kwa kuwaona wanyama wa aina mbalimbali lakini pia huku wakiburudika kwa maji na bia ya Serengeti.

Mmoja wa kundi la watalii hao Sara Alza Puravuda na Patricia Ponce Mateos toka Majiji ya Barcelona na Sevilla nchini Hispania wanasema kwa muda wote waliokuwa wakifanya utalii ndani ya hifadhi ya Serengeti walipata fursa ya kukutana na bidhaa hizo zenye jina sawa na hifadhi waliyokuwemo na kuelezea kwamba hatua hiyo itazidi kulipaisha jina la Serengeti katika vivutio maalum vya utalii kimataifa hivyo kuisaidia Tanzania kuongeza idadi kubwa ya watalii.

 MWISHO.

Mkurugenzi Mtendaji wa Mara Dairy James Mathayo akitoa maelezo ya usindikaji wa maji ya Serengeti kwa Waziri wa Maliasili na Utalii Profesa Jumanne Maghembe katika moja ya maonesho ya kibiashara.