ASKOFU SDA MARA AWACHARUKIA WANAOTAKA KUVURUGA AMANI

Na Bigambo Jeje,Musoma

 

Askofu wa Kanisa la Waadventista Wasabato (SDA) jimbo la Mara Baba Daud Makoye amewataka wanasiasa na wanaharakati wote kutoliingiza taifa katika vurugu na machafuko wakati huu wa  mchakato wa kutafuta katiba mpya na badala yake wahakikishe katiba hiyo inapatikana kwa njia ya amani na wala si vinginevyo.

 

Askofu Makoye ametoa wito huo mjini Musoma siku ya Jumamosi katika hotuba yake ya kufunga mkutano wa mwaka wa  Makambi ulioandaliwa na makanisa sita ya Wasabato ya Mtaa wa Mwisenge katika jimbo hilo laMara.

 

Amesema suala la kutafuta katiba mpya ni jambo jema na lenye maslahi kwa Watanzania wote wenye itikadi mbalimbali za kisiassa,kidini,kikabila,kiuchumi na kijamii hivyo mchakato wake unahitaji kutanguliza maslahi ya watu wote na si ya watu wachache tu huku utunzaji wa amani ya nchi ukitakiwa kupewa kipaumbele zaidi kuliko kitu chochote kile.

 

Amesema kwamba wanasiasa na wanaharakati wa haki za binadamu katika baadhi ya nchi hapa duniani walitumia fursa za michakato kama hiyo kuvuruga amani na kusababisha machafuko katika nchi zao kwa tamaa za fedha,mali na madaraka jambo ambalo amekemea vikali kuwa halitakiwi kabisa kutokea kwa nchi yenye kisiwa cha amani kama Tanzania.

 

Amefafanua kuwa vurugu na machafuko yaliyojitokeza kwa majirani zetu wa Kenya mwaka 2007 sanjari na kutoweka kwa amani katika nchi za Somalia,DRC Kongo na Nigeria ni fundisho kwa Tanzania kwamba hatuna budi kuchezea amani iliyopo sasa na kutakiwa kuilinda kwa gharama ya aina yoyote maana hakuna mbadala wake.

Kwa msingi huo Askofu huyo wa kanisa la Waadventista Wasabato jimbo la Mara ametanabaisha kuwa kanisa hilo linaungana na watanzania wote kuomba kwa Mungu amani ya nchi hii iendelee kudumu kwa ajili ya ustawi wa watu wote huku akiongeza kwamba hakuna maendeleo yoyote yale yatakayopatikana bila kuwepo kwa amani.

Baba Askofu Makoye amesema kupatikana kwa katiba mpya kwa njia ya amani kutaendelea kuijengea heshima kubwa nchi  yetu katika mataifa mbalimbali duniani ambapo Tanzania inajivunia kumaliza mambo yake ya ndani kimya kimya bila kuhitaji misaada ya ama mataifa makubwa au jumuiya za kimataifa tofauti na nchi nyingine ambazo zinahitaji kusaidiwa kutatua migogoro yao ya ndani.

 

                                                             MWISHO.