CCM MUSOMA YAMVAA NYERERE AHADI ZA KIKWETE

Na Bigambo Jeje,Musoma

Chama cha Mapinduzi(CCM) katika wilaya ya Musoma kimemtaka mbunge wa jimbo la Musoma Mjini Mhe:Vicent Nyerere kuacha kujipatia umaarufu kisiasa kwa kuendelea kulaghai na kupotosha wananchi juu ya ukweli wa miradi ya maendeleo iliyoahidiwa na Rais wa Jamuhuri ya Muungano Mhe:Dk Jakaya Kikwete wakati wa kampeni za uchaguzi mkuu wa mwaka 2010.

Mjumbe wa Halmshauri Kuu ya CCM Taifa (NEC) Mhe:Vedastus Mathayo ametoa kauli hiyo wakati akihutubia maelfu ya wananchi wa Manispaa ya Musoma katika mkutano wa hadhara ulioandaliwa na chama hicho na kufanyika katika uwanja wa shule ya msingi Mukendo.

Mathayo amesema kuwa mbunge huyo amekuwa akiendelea kutumia vibaya miradi ya maendeleo inayotekelezwa katika jimbo la Musoma Mjini iliyoahidiwa na Mwenyekiti wa CCM Taifa Mhe:Kikwete kwa wakazi wa Musoma Mjini alipokuwa akinadi ilani ya CCM katika uchaguzi mkuu uliopita.

Miradi hiyo ni pamoja na ujenzi wa barabara kwa kiwango cha lami kati ya Musoma na Lamadi mkoa wa Simiyu yenye thamani ya sh.bilioni 85 ujenzi ambao uko katika hatua za mwisho, ujenzi wa mradi mkubwa wa maji safi na salama toka Ziwa Victoria wenye thamani y ash.bilioni 14 sanjari na uendelezaji wa ujenzi wa hospitali ya kumbukumbu ya Mwalimu Nyerere iliyopo eneo la Kwangwa ambayo kwa pamoja iliahidiwa Dk Kikwete na imetekelezwa na serikali yake.

Mjumbe huyo wa NEC amemtaka Mhe:Myerere kuacha upotoshaji huo na badala yake awaeleze wapiga kura wake ametekelezaje ahadi zake lukuki alizoahidi katika uchaguzi mkuu uliopita ambapo baadhi ya ahadi hizo zilikuwa ni pamoja na kusambaza mtandao wa maji katika mitaa yote ya Musoma Mjini baada ya kuuza magari ya serikali ya sekta ya maji aliyodai hayana faida kwa wananchi.

Mathayo amezitaja ahadi nyingine zinazotakiwa kutekelezwa na mbunge huyo ni zile za kutoa ajira kwa vijana katika vyombo vya dola kama vile uhamiaji,polisi,magereza na JWTZ, kufuta ushuru kwa wafanyabishara wadogo,kutengeneza madawati katika shule zote za msingi na sekondari, kubomoa na kujenga upya barabara za lami katika Manispaa ya Musoma ahadi ambazo hajawahi kuanza kuzitekeleza hata kwa sehemu ndogo tu.

Kwa msingi huo amewataka wananchi wa Musoma Mjini kuachana na propaganda za kiongozi huyo juu ya miradi ya maendeleo inayoendelea kutekelezwa na serikali kwamba inatokana na ilani ya uchaguzi ya CCM chini ya Rais Dk Jakaya Kikwete licha ya chama hicho kutopewa ridhaa ya Ubunge na madiwani katika uchaguzi wa 2010 ambapo chama cha CHADEMA kilipewa ridhaa hiyo.

MWISHO.