WASABATO KANISA LA MARA LALILIA AMANI

Na Bigambo Jeje,Musoma.

Kanisa la Waadventista la Wasabato(SDA) jimbo la Mara limewataka Watanzania kuombea amani iliyopo hapa nchini ili iendelee kudumu, hivyo kulisaidia taifa  kuepukana na matukio ya ugaidi na vita vya wenyewe kwa wenyewe vinavyozikumba baadhi ya nchi za Afrika na kwingineko duniani.

Mwinjilisti Mlei wa kanisa hilo Asheri Mukama ametoa kauli hiyo mjini Musoma August 02 mwaka huu katika kanisa la Wasabato la Kamunyonge  wakati akiendesha ibada maalum ya changizo la fedha za mkutano wa injili wa  makambi unaotarajiwa  kufanyika katika kanisani hapo kati ya mwezi  August 17 hadi August 23 mwaka huu.

Mukama amesema kwamba Watanzania wote bila kujali itikadi zao kidini,kisiasa na kikabila hawana budi kuendelea kuombea amani ya taifa hili iliyoasisiwa na marehemu Baba wa Taifa Mwalimu Julius Nyerere na kuifanya nchi kuheshimika katika medani ya kimataifa kwa kuwa kisiwa cha amani.

Amesema kuwa matukio ya kigaidi ya Alshabab yanayozitesa nchi za Kenya,Uganda na Somalia sanjari na kundi la kigaidi la Boko Haramu nchini Nigeria huku makundi ya waasi yakizisumbua nchi za Rwanda na DRC Kongo ni fundisho kwa Tanzania kwamba hatuna budi kuchezea amani iliyopo sasa na kutakiwa kuilinda kwa gharama ya aina yoyote maana hakuna mahali inapopatikana tena ikiuzwa mara tu inapotoweka.

Amesema dunia kwa hivi sasa inashuhudia damu nyingi za watu wasio na hatia zikimwagika bure katika matukio ya ugaidi sambamba na vita na kutishia amani kutoweka katika nchi nyingi,hali ambayo amesema inasababishwa na kuongezeka kwa uasi na kupungua kwa upendo miongoni mwa wanadamu mambo yanayotakiwa kuepukwa na wananchi wote wenye mapenzi mema na nchi hii.

Akizungumzia suala la Katiba mpya, Mwinjilisti Mlei Mukama ameisihi kamati ya maridhiano ya bunge maalum la Katiba aliyoiunda Mwenyekiti wa bunge hilo Mhe:Samweli Sitta kuweka mbele  mustakabali na maslahi ya nchi kwanza kuliko kitu kingine chochote kile na kukubaliana kupitisha katiba itakayoendelea kuweka misingi mizuri ya amani huku akiwataka wabunge wa UKAWA kurejea bungeni kuendelea na mjadala wa rasimu ya katiba mpya.

Aidha Mwinjilisti huyo Mlei amesema kupatikana kwa katiba mpya kwa njia ya amani kutaendelea kuijengea heshima kubwa nchi  yetu katika mataifa mbalimbali duniani ambapo Tanzania inajivunia kumaliza mambo yake ya ndani kimya kimya bila kuhitaji misaada ya ama mataifa makubwa au jumuiya za kimataifa tofauti na nchi nyingine bali ni kinara wa kusaidia kutatua migogoro ya majirani zake pale inapoombwa kufanya hivyo.

MWISHO.