KANISA LA WASABATO KAMUNYONGE MUSOMA LAKUNWA NA WARAKA

Pichani ni Mchungaji wa Kanisa la Wasabato Mtaa wa Kamunyonge Muso Stehen Muso akiwa katika moja ya mahubiri yake katika kanisa hilo (Picha na Bigambo Jeje)

Na Bigambo Jeje,Musoma

Kanisa la Waadventista la Wasabato (SDA) la Kamunyonge la Mjini Musoma ambalo ni kanisa Kuu katika jimbo la Mara, limeunga mkono hatua ya serikali ya kufuta utaratibu wa vyuo vikuu mbalimbali hapa nchini kuwalazimisha wanafunzi kufanya mitihani katika siku zao za ibada hususani siku ya jumamosi.

Mchungaji wa kanisa hilo kuu la SDA la Kamunyonge Stephen Muso amesema katika taarifa yake kwa vyombo vya habari kuwa, hatua hiyo itawaondolea kero ya kuabudu wanafunzi waliokuwa wakilazimishwa kuhudhuria makongamano na kufanya mitihani katika siku zao za ibada hivyo kuingilia uhuru wao wa kuabudu na kuvunja katiba ya nchi.

Mchungaji Muso amesema kwa mujibu wa ibara ya 19 ya katiba ya Jamhuri ya Muungano wa Tanzania ya mwaka 1977 inatoa uhuru wa mtu yeyote kuabudu bila shuruti na akatanabaisha kwamba mazoea yaliyokuwa yakifanywa na baadhi ya walimu katika vyuo hivyo ilikuwa ni ukiukwaji na uvunjaji wa moja kwa moja wa  sheria ya nchi.

Amesema kanisa la Waadventista Wasabato limeamua kutoa pongezi hizo kwa serikali inayoongozwa na Rais Dk Jakaya Mrisho Kikwete baada ya kupokea malalamiko toka kwa baadhi ya wanafunzi na kwa kuzingatia ushauri wa Mwanasheria Mkuu wa Serikali(AG) ukafanyiwa kazi na kutolewa uamuzi bila kusita.

Serikali imesema imeamua kwa dhati kabisa kuchukua hatua hiyo baada ya kuwepo kwa malalamiko mengi ya wanafunzi toka vyuo mbalimbali wakihoji kwanini walazimishwe kufanya mitihani siku za mwisho wa juma badala ya siku za kawaida za kazi hatua iliyowafanya baadhi yao kusitisha masomo na kurudi nyumbani kwa uhuru wao dini kuingiliwa pasipo sababu zozote za msingi.

Katibu Mkuu wa Wizara ya Elimu na Mafunzo ya Ufundi katika waraka wake wa Novemba 11 2014 kwenda kwa Makamu na Wakuu wote wa vyuo vikuu na Vishiriki amewataka kuachana kabisa na utaratibu huo wa mazoea ya kuwafanyisha mitihani wanafunzi siku za ibada zao kwa kuwa ni ukiukwaji wa haki za binadamu na uvunjaji wa katiba ya nchi.

Kwa mujibu wa waraka huo wenye Kumb Na: ED/OKE/NE/VOL.1/01/49 uliyosainiwa kwa niaba yake na C.P Mgimba utatoa uhuru wa kuabudu hata kwa wale wanafunzi waliokubali kufanya hivyo kwa shingo upande tu huku wakihofia ama kufukuzwa vyuo kwa kutoifanya mitihani hiyo au kuogopa kuidai haki yao ya kimsingi kama ilivyobainishwa katika katiba ya nchi.

MWISHO.