KAMBI YA UPINZANI YAMTAKA KIKWETE AMTIMUE NYARANDU

Pichani kulia ni Mwenyekiti wa halmshauri ya wilaya ya Serengeti Bw. John Ng'oina akiendesha kikao cha baraza hapo jana na kushoto ni Mkurugenzi wa halmshauri hiyo Bi Good Pamba (Picha Na Bigambo Jeje) 

 Picha ya Maktaba ya Waziri Nyalandu.

\

 Rais Jakaya Kikwete anayeombwa amtimue Nyarandu

Na Bigambo Jeje,Serengeti.

 

Kambi ya upinzani  ya baraza la madiwani wa halmashauri ya wilaya ya Serengeti mkoani Mara imemtaka Rais Jakaya Kikwete kumfukuza kazi Waziri wa Maliasili na Utalii Mhe: Lazaro Nyarandu baada ya Waziri huyo kupingana na ahadi ya Rais ya kujengwa kwa uwanja wa ndege wa kimataifa wa  Mugumu.

Kambi hiyo ikiongozwa na msemaji wake Bw.Tanu Mwita amesema hatua hiyo ya kumpinga Rais Kikwete juu ya ujenzi huo wa ndege wa kimataifa inatosha kabisa kuvuliwa wadhifa wake kwa kile alichodai ni sawa na kuhujumu kiuchumi Watanzania hususani wananchi wa Serengeti na mkoa wa Mara kwa ujumla sanjari na kukiuka kiapo cha utii kwa mkuu wake wa kazi.

Bw.Tanu ambaye ni diwani wa kata ya Kisangura amesema kauli ya hivi karibuni ya Waziri Nyarandu ya Novemba mosi mwaka huu kupitia baadhi ya vyombo vya habari ni ya kutaka kurudisha nyuma maendeleo ya kukuza sekta ya utalii na uchumi wa taifa hili linalopiga hatua za kimaendeleo.

Kauli hiyo imetolewa wakati baraza la madiwani la halmshauri hiyo likijadili ajenda ya kupokea hati ya kuruhusu ujenzi wa uwanja huo wa ndege wa kimataifa unaotarajiwa kujengwa kwa msaada wa kampuni ya uwekezaji ya Singita Grumet toka nchini Marekani iliyowekeza katika sekta ya utalii ndani ya hifadhi ya wanyama ya Serengeti.

Kwa upande wake mwenyekiti  wa halmashauri ya wilaya Serengeti Bw. John Ng’oina  amesema kuwa wamekabidhiwa hati hiyo kwa kulazimisha kwani Waziri Nyarandu alikataa kwa madai kuwa haiwezekani kujengwa kiwanja cha ndege katika mbuga na kwamba hata kama wakijenga hatahakikisha ndege hazitui.

Bw. Ng’oina amesema kauli hiyo ya Nyarandu aliitoa wakati alipohojiwa na gazeti la East Africa la Novemba mosi mwaka huu akisema uwanja huo unajengwa umbali wa km 40 tokaa hifadhi ya Serengeti jambo lisilowezekana kisheria lakini hiyo ilikuwa ni kuwahadaa Watanzania kwa vile umbali wa kutoka hifadhini hadi eneo la uwanja ni km 70. 

“ Rais anasimama anasema kiwanja cha ndege kitajegwa kwa gharama zozote,Waziri wake anasimama anapinga, hii kweli ni akili” alihoji Ng’oina  na kushangiliwa na madiwani wa baraza hilo huku baadhi yao wakipaza sauti wakisema afukuzwe kazi maana ameonekana msaliti na wengine wakiwataka viongozi wa dini kumwombea kwa kile walichodai amelewa madaraka.

Bw. Ng’oina alisema wao kama halmashauri wanayo dhamana ya kuhoji, kudai na kutetea haki yao kama viongozi waliochaguliwa na wananchi, na kwamba hakuna halmashauri nchi hii yenye kiwanja cha ndege,ila kuna baadhi  ya viongozi  wachache ambao  walikuwa hawaitakii mema halmashauri na kuyapuuza madai kuwa endapo kiwanja cha ndege kitajengwa  wanyama kama  nyumbu watatoka mimba kutokana na mlio wa ndege jambo ambalo si kweli.

Aidha Madiwani wa halmashauri hiyo wamempongeza Rais Jakaya Kikwete kwa kutekeleza ahadi yake ya ujenzi wa kiwanja cha ndege huku Jumanne Kwiro,Makamu Mwenyekiti wa halmashauri hiyo akisema madiwani kwa pamoja wanalaani vikali kitendo cha Waziri Nyarandu  kupinga maendeleo kwa kukataa ujenzi wa kiwanja cha ndege licha ya kutowahi kufika wilayani Serengeti.

MWISHO.