KABAKA ALIA NA VIONGOZI WA DINI KUHUSU AJIRA

                                                        Mhe: Joshua Mirumbe - Mkuu wa wilaya ya Bunda

Na Bigambo Jeje,Musoma.

Waziri wa Kazi na Ajira Mhe:Gaudensia Kabaka amewataka viongozi wa madhehebu ya dini kubuni miradi ya maendeleo katika taasisi za kidini wanazoziongoza ili kusaidia kupatikana kwa ajira katika sekta binafsi sanjari na kupunguza umasikini uliokithiri katika jamii hivyo kuisaidia serikali kutekeleza kwa vitendo dira ya taifa ya maendeleo.

Waziri Kabaka ametoa kauli hiyo jana katika hotuba iliyosomwa kwa niaba yake na Mkuu wa wilaya ya Bunda mkoani Mara Joshua Mirumbe wakati wa sherehe maalum ya kwaya iliyoambatana na harambee ya kuchangia fedha za miradi ya maendeleo ya kwaya ya kanisa la Wasabato la Kamunyonge la Mjini Musoma iliyofanyika katika viwanja vya kanisa hilo.

Amesema kuwa madhehebu ya dini yanayo nafasi kubwa ya kuhakikisha kwamba yanaanzisha miradi itakayowasaidia waumini wao kupata ajira hivyo licha ya waumini kujipatia kipato bali pia taasisi hizo za kidini zitajiimarisha kiuchumi kwa kupata matoleo ya sadaka na zaka za uhakika na kuendesha shughuli zao bila kutegemea misaada ya wahisani wa ndani na nje ya nchi.

Amewataka viongozi wote wa madhehebu ya dini hapa nchini kujikita zaidi katika miradi ya kiuchumi,elimu na afya kwa kuanzisha vikundi vya kuweka na kukopa,shule za msingi,sekondari na vyuo mbalimbali sambamba na miradi ya afya kama vile zahanati,vituo vya afya na hospitali, hatua itakayoleta matumaini makubwa kwa wananchi wanaoishi katika hali ya umasikini mkubwa.

Waziri Kabaka katika harambee hiyo alichangia kiasi cha sh milioni 3 huku mkuu wa wilaya ya Bunda akichanga sh laki saba kati ya kiasi cha sh milioni 15 zilizopatikana zikiwa ni taslimu na ahadi kutoka kwa waalikwa mbalimbali waliohudhuria katika harambee iliyoendana pia na uzinduzi wa kanda za nyimbo za Video na Sauti za kwaya hiyo kongwe hapa nchini.

Kwa upande wake Mkuu wa kwaya hiyo Asheri Mukama amesema lengo la harambee hiyo ilikuwa ni kupata fedha kiasi cha sh milioni 50 zinazohitajika kwa ajili yamiradi ya maendeleo ya kwaya hivyo itakayosaidia kwaya kujikwamua kiuchumi na kuachana na utegemezi wa wahisani mbalimbali pale inapokuwa ikihitaji kutekeleza majukumu yake.

Mukama amefafanua kuwa hiyo ni harambee ya pili ya kwaya kufanyika tangu Septemba 04 mwaka 2010,wakati Rais Jakaya Kikwete alipochangia kiasi cha sh.milioni 3 na kufanikisha kupatikana kwa jumla ya sh milioni 12 zilizotumika katika shughuli mbalimbali za kwaya hiyo.

Aidha amesema baada ya kumalizika kwa harambee hiyo,kwaya inajiandaa kwa safari yao ya kwenda jijini Dar es Salaam kuliwakilisha kanisa la Wasabato jimbo la Mara katika mkutano mkubwa wa injili wa kimataifa unaozishirikisha nchi 11 za Afrika Mashariki,Kati na Pembe ya Afrika utakaoanza February mosi mwaka.

MWISHO.