ZAHANATI YA MWIRINGO KUWANUFAISHA WATU 4000 KIAFYA

Bigambo Jeje,Musoma

Wananchi zaidi ya 4000 wa vijiji vitatu vya kata ya Busambara katika halmshauri ya wilaya ya Musoma Vijijini mkoani Mara watanufaika na huduma za afya baada ya zahanati inayojengwa katika kijiji cha Mwiringo kwa gharama y ash. milioni 150 kukamilika siku chache zijazo.

Mganga mkuu wa halmashauri hiyo ya Musoma Vijijini Dk Genchwere Makenge amewaambia waandishi wa habari mjini Musoma kuwa ujenzi huo unaofadhiliwa na wafadhili mbalimbali akiwemo bw. Michael Mujinja unatarajiwa kukamilika mwishoni mwa mwezi January mwaka huu na kupisha huduma za afya kuanza mara moja.

Dk Makenge amesema kukamilika kwa zahanati hiyo ya kisasa ya kijiji cha Mwiringo kutapunguza adha ya wananchi wa vijiji vya kata hiyo vya Kwikuba,Busambara na Mwiringo waliokuwa wakipata huduma za afya katika kata ya jirani ya Mugango na wakati mwingine kulazimika kwenda hospitali ya serikali ya mkoa wa Mara iliyopo mini Musoma.

Ametanabaisha kuwa awali ujenzi huo ulikumbana na changamoto kadhaa zikiwa ni pamoja na wananchi kusuasua kuchangia nguvu zao za kujitolea kusoma mawe,matofali,maji na mchanga wakidhani kuwa jukumu hilo lilikuwa la wafadhili pekee lakini walishiriki kikamilifu baada ya kuhamasishwa na kufahamu kuwa mradi huo ulikuwa si kwa faida ya mtu mwingine bali jamii yao kwa ujumla.

Amesema sababu za kisiasa nazo zilichangia kuzorota kwa ujenzi wa zahanati hiyo ambapo baadhi ya wanasiasa walipita huku na kule wakiwapotosha wananchi kuwa mradi huo ulikuwa ni wa watu binafsi na si wa serikali jambo lililosababisha wengi wao kukatishwa tama hadi hapo uongozi wa halmshauri ulipoishirikisha jamii na hatimaye mwanakijiji mmoja bw. Merika Rwoti akakubali kutoa shamba lake bila shuruti ili ujenzi uanze.

Akizungumzia miradi mingine ya afya katika halmshauri hiyo ya Musoma, Dk Makenge amesema kuna vijiji 68 lakini kati ya hivyo vyenye zahanati ni 27,hivyo kuwa na upungufu mkubwa wa zahanati kwa mujibu wa sera ya afya ya kusogeza karibu huduma za afya kwa  kila kata kuwa na kituo cha afya sanjari na  kila kijiji kuwa na zahanati.

Mganga mkuu huyo amefafanua kuwa ujenzi wa zahanati katika kata za  Etaro na Kigera Etuma ama umekamilika au uko katika hatua za mwisho huku ujenzi wa zahanati za Chirorwe na  Maneke ukiendelea kwa hatua ya kati wakati ujenzi huo kwa zahanati ya kijiji cha Nyasaungu ukiwa katika hatua ya awali.

MWISHO.