HAPA KAZI TU IGUSE TAASISI ZILIZOLIMBIKIZA MADENI

Makamu wa Rais Mstaafu wa Jamhuri ya Muungano wa Tanzania, Dkt. Mohammed Gharib Bilal, akipata maelezo ya mradi huo kutoka kwa Mkurugenzi wa Mtendaji wa Mamlaka ya Maji Musoma, Gantala Said, wakati wa sherehe za Kilele cha maadhimisho ya 27 ya Wiki ya Maji zilizofanyika Kitaifa Mkoani Mara jana Machi 22, 2015.

Imeandikwa na Bigambo Jeje.

Imechapishwa: 20 Januari 2016 

MAMLAKA ya Maji Safi na Taka ya Musoma Mjini (MUWASA) ni moja ya taasisi za umma ambazo kama zitalipwa ipasavyo na wadeni wake, zinaweza kuboresha utendaji kazi wake kuliko ilivyo sasa.

Wananchi wengi wa mji wa Musoma ambao wamekuwa wakilalamikia huduma ya maji, wamekuwa wakikutana na kauli ya ukata inayoisumbua mamlaka hiyo kutokana na kudai Sh milioni 560 ambazo hazijalipwa na baadhi ya Taasisi za Serikali mkoani Mara kutokana na taasisi hizo kulimbikiza ankra za huduma ya maji kwa muda mrefu.

Kutokana na serikali ya Awamu ya Tano kuanza kazi kwa kuhimiza ukusanyaji mzuri wa mapato na kubana matumizi, wengi sasa wana matumaini kwamba taasisi za serikali ambazo zimekuwa zikilimbikiza madeni zitaanza kulipa madeni yao ili kuziwezesha taasisi zingine zinazotoa huduma zimudu kutoa huduma nzuri zaidi.

Lima Masinde, ambaye ni mteja wa kawaida wa Muwasa, anasema ili kutekeleza kwa vitendo kaulimbiu ya Rais Magufuli ya Hapa Kazi Tu taasisi za serikali zinazodaiwa na watu binafsi au taasisi zingine za serikali, hazina budi kulipa madeni yao ili taasisi kama Muwasa ziweze kumudu kuwahudumia vyema wateja wao wakiwemo wananchi wanaolipa kwa wakati.

Masinde anasema kitendo cha baadhi ya taasisi za serikali kulimbikiza madeni ya huduma ya maji kwa muda mrefu kinakwenda kinyume na sheria ya Maji Na 12 ya mwaka 2009, ibara ya 20 na 21 inayosisitiza umuhimu wa mteja kupewa maji na kuhakikisha analipa kwa wakati bila shuruti, vinginevyo mteja anaweza kufikishwa mahakamani. “Sheria ya Maji inayosimamiwa na serikali iko bayana kabisa juu ya umuhimu wa kuhudumiwa na kuilipia huduma hiyo.

Hivyo kwa kutumia sheria hiyo ni vyema mamlaka za juu, hata kama ni Rais Magufuli aziagize wizara husika ambazo taasisi zake zinadaiwa kulipa madeni yao ili kuikwamua mamlaka kujiendesha kwa ufanisi,” anasema.

Mteja mwingine, Selemani Bakari, mkazi wa Nyasho, mjini Musoma anapokea taarifa hizo kwa mshangao na kuhoji iweje wateja wa kawaida walipe ankara zao kwa wakati na pale inapotokea kuchelewa kulipa baada ya mwezi mmoja tu Muwasa huwa inawakatia huduma ya maji lakini kumbe kuna wateja wakubwa ambao wamelimbikiza madeni kwa muda wa takriban mwaka mmoja sasa bila kulipa ankara zao. “Taarifa hizi kwa ujumla zimenishitua sana.

Nashangaa kusikia kwamba hata taasisi kama hospitali ya rufaa ya Musoma inayopokea ruzuku kila mwezi kwamba nayo inadaiwa mamilioni ya pesa. Ninajua umuhimu wa maji kwa hospitali na haipendezi kukata maji katika eneo nyeti kama hilo, lakini ni vyema ikahakikisha inalipia huduma ya maji ili iendelee kupatikana,” anasema Bakari.

Naye Katibu Mwenezi wa CCM Mkoa wa Mara, Maximillian Ngesi, anaamini kwamba kutokana na kasi ya utendaji kazi wa Rais John Magufuli, serikali itaboresha kwa haraka huduma zote za kijamii, ikiwa ni pamoja na kuhakikisha Muwasa inalipwa kwani ni sehemu ya utekelezaji wa Ilani ya Chama Cha Mapinduzi (CCM) ya mwaka 2015 hadi 2020.

Ngesi anasema ili kutekeleza Sera ya Maji ya mwaka 2002 inayolenga katika kuhakikisha kuwa, wananchi vijijini wanapata huduma ya maji safi na salama umbali usiozidi mita 400 kutoka kwenye makazi yao sambamba na huduma ya maji mijini, taasisi hizo lazima zihakikishe zinalipa fedha zinazodaiwa kama njia ya kuiwezesha Muwasa kuendelea kutoa huduma bora.

Mkurugenzi Mtendaji wa Muwasa, Said Gantala anathibitisha kuwepo kwa deni hilo na kuzitaja taasisi zinazodaiwa kuwa ni pamoja na Ofisi ya Kamanda wa Polisi Mkoa, Ofisi ya Mkuu wa Magereza Musoma, Hospitali ya Rufaa ya serikali ya mkoa wa Mara pamoja na Manispaa ya Musoma mkoani Mara.

 Gantala anasema taasisi hizo zimeshindwa kulipa madeni hayo na kuiweka pabaya mamlaka yake katika kuwahudumia wananchi kwa vile Muwasa haipokei ruzuku yoyote ile ya kusaidia uendeshaji kama zilivyo taasisi na idara nyingine za serikali zinazopata ruzuku kutoka hazina kila mwezi.

Anasema amejitahidi kwa kiasi kikubwa kukutana na wakuu wa taasisi hizo ili kuangalia jinsi wangechukua hatua ya kuanza kulipa madeni yao kwa awamu lakini hadi sasa hakuna hatua za utekelezaji zilizochukuliwa na wakuu hao.

“Sisi kama mamlaka tayari tumeshatoa taarifa ya kusudio la mwezi mmoja la kuzifikisha mahakamani taasisi hizo pale zitakaposhindwa kulipa madeni hayo na hatutasita pia sasa kuzisitishia huduma ya maji bila kujali umuhimu wa watu wanaowahudumia kama hospitali na magereza,” anasema.

Mkurugenzi huyo Mtendaji wa MUWASA anafafanua kuwa hospitali ya rufaa ya serikali ya mkoa wa Mara ndiyo inayoongoza kwa kudaiwa Sh milioni 176.5 ikifuatiwa na Ofisi ya Kamanda wa polisi mkoa wa Mara inayodaiwa Sh milioni 175.9 huku Ofisi ya Mkuu wa Magereza mkoa wa Mara na Mkurugenzi wa Manispaa ya Musoma wakidaiwa Sh milioni 155.5 na Sh milioni 40.2.

Gantala anakiri kwamba wakati wateja wao wa nyumbani na sehemu za kibishara wakilipa kwa asilimia 100, tatizo liko kwa baadhi ya taasisi na ndio maana anaomba sasa kila taasisi ya serikali inayodaiwa, si na Muwasa pekee bali na watoa huduma zingine kulipa madeni.