KERO YA MAJI MUSOMA, BUNDA KUBAKI HISTORIA

Imeandikwa na Bigambo Jeje.

Imechapishwa: 06 Juni 2016 

Waziri wa Maji na Umwagiliaji, Gerson Lwenge akikata utepe kuzindua ujenzi wa tangi la maji kata ya Rwamlimi mjini Musoma

MAMIA ya maelfu ya wakazi wa Manispaa ya Musoma na wilaya ya Bunda mkoani Mara, siyo muda mrefu wataanza kunufaika na huduma ya maji safi na salama baada ya miradi ya maji kukamilika.

Miradi hiyo inatarajiwa kuzinduliwa kati ya Juni na Julai mwaka huu, hatua utakayomaliza kwa kiwango kikubwa kero ya upatikanaji wa maji salama takribani iliyodumu kwa muda mrefu.

Wakati wa ziara yake ya kutembelea miradi ya maji mkoani Mara mwezi Machi mwaka huu, Waziri wa Maji na Umwagiliaji, Gerson Lwenge, aliwaagiza wakandarasi wa miradi hiyo ambao ni kampuni za Spencon na Mauza Nyakirang’ani, kuhakikisha zinakamilisha kazi hizo ndani ya muda wa mkataba na tayari miradi hiyo imekamilika kwa wastani wa zaidi ya asilimia 90.

Miradi hiyo mikubwa ya maji iliyojengwa kwa ushirikiano baina ya wafadhili na serikali, ni ahadi za serikali kwa wananchi zilizotolewa kwa nyakati tofauti na serikali ya awamu ya nne iliyokuwa inaongozwa na Jakaya Kikwete kama sehemu ya utekelezaji wa ilani ya Chama Cha Mapinduzi (CCM).

Miradi hiyo ni pamoja na ule mradi mkubwa wa maji wa Musoma Mjini unaojengwa katika eneo la Bukanga, kata ya Makoko unaotarajiwa kuanza kusukuma maji kwa wananchi ifikapo Juni 30 mwaka huu na wa Nyabehu wilayani Bunda.

Wakati mradi wa Bukanga umegharimu Sh bilioni 45 ule wa Nyabehu umegharimu Sh bilioni 10. Mkurugenzi wa Mamlaka ya Maji na Usafi wa Mazingira Musoma (Muwasa) ambaye ofisi yake iliopewa jukumu la kusimamia miradi yote ya mamlaka za maji mkoani Mara.

Said Gantala anasema miradi hiyo miwili sasa iko katika hatua za mwisho kabisa na kwamba itakabidhiwa ndani ya miezi hii ya Juni na Julai mwaqka huu.

Gantala anasema kukamilika kwa miradi hiyo kunahitimisha ule msemo wa Kiswahili usemao kwamba “mnyonge mnyongeni lakini haki yake mpeni” akimaanisha kwamba licha ya kejeli za baadhi ya wanasiasa wa kambi ya upinzani, Rais mstaafu Kikwete daima atakumbukwa na wananchi wa mkoa wa Mara kwa kutekeleza ahadi yake ya kuwapatia maji safi na salama kutoka Ziwa Victoria sambamba na vyanzo vingine vya maji.

“Rais mstaafu, Jakaya Kikwete alitoa ahadi hiyo wakati akihutubia maelfu ya wakazi wa mkoa wa Mara mjini Musoma Septemba 25 mwaka 2010 na kutoa ahadi kadha wa kadha lakini suala la miradi ya maji alilipa kipaumbele zaidi na kuahidi kwamba endapo angepewa ridhaa tena ya kuwaongoza Watanzania angelihakikisha miji ya Musoma, Bunda, Mugumu, Tarime na miji midogo ya Mugango, Kiabakari na Butiama inapata maji safi na salama,” anasema.

Gantala anafafanua kwamba miradi yote hiyo ni ahadi za serikali kupitia utekelezaji wa Ilani ya Uchaguzi ya CCM ya mwaka 2010 hadi 2015 kama ilivyoainishwa katika ibara ya 86 (a), (e) na (i) zinazozungumzia kuongeza upatikanaji wa huduma ya maji safi na salama kufikia asilimia 65 vijijini na mijini asilimia 75.

Anasema kwamba mbali na serikali kutekeleza ilani ya uchaguzi ya CCM, pia kupitia Muwasa inatekeleza Sera ya Maji ya mwaka 2002 inayolenga katika kuhakikisha kuwa, wananchi vijijini wanapata huduma ya maji safi na salama umbali usiozidi mita 400 kutoka kwenye makazi yao.

Anafafanua kuwa madhumuni ya sera hiyo ni kuwezesha uendelezaji na usimamizi endelevu wa utoaji wa huduma ya maji safi na uondoaji majitaka kwa wakazi wa mijini huku madhumuni hayo yakifikiwa kwa kuweka malengo na kutoa miongozo na vigezo vya utekelezaji wa shughuli zinazofanywa na Mamlaka za Maji safi na Majitaka mijini pamoja na watekelezaji wengine.

Aidha, anasema sera hiyo ya maji inalenga katika masuala mbalimbali ikiwemo kutoa mwongozo wa namna ya kuendeleza na kusimamia huduma ya majisafi na majitaka mijini kwa ufanisi sambamba kuweka mazingira mazuri yatakayoivutia sekta binafsi kuwekeza katika kutoa huduma ya majisafi na uondoaji majitaka mijini.

Mkurugenzi huyo Mtendaji wa MUWASA anatabaisha kuwa madhumuni mengine katika sera hiyo ni pamoja na kuhakikisha kuwa upo muundo mzuri wa kitaasisi unaovipa vyombo vya uendeshaji huduma ya majisafi na majitaka mijini madaraka ya kujiendesha vyenyewe kibiashara.

Hiyo ni pamoja na kuwa na mfumo madhubuti na wenye ufanisi wa ukusanyaji maduhuli yatokanayo na mauzo ya majisafi na uondoaji wa majitaka na hivyo kuongeza mapato sanjari na kupunguza upotevu wa maji na kuboresha uondoaji wa majitaka.

Gantala anafafanua kuwa kukamilika mwa miradi hiyo kutatoa nafuu kwa watumiaji wa maji kwa kupunguza bei ya ankara za maji ili kutoa fursa kwa watu wengi kutumia huduma hiyo muhimu.

Anaongeza kwamba mradi mkubwa wa maji wa Musoma Mjini una tangi la maji litakalotumika kusambaza maji katika kata za Rwamlimi na Bweri na kwamba tanki hilo linajengwa kwa nguvu za Mamlaka ya Maji Musoma ambapo mamlaka hiyo inatarajia kuongeza wateja 1,000 kupitia tangi hilo.

“Tangi hilo lina ujazo wa lita 135,000 na litahudumia maeneo ya Rwamlimi, Songambele, Songe na taasisi nne shule za sekondari na msingi na litatumika kama msaada wa tanki kuu litakalojengwa eneo la Kwangwa.

Gharama za ujenzi wa tanki hilo ni Sh milioni 55 lakini kama lingejengwa na mkandarasi lingetumia zaidi ya Sh milioni 110, hivyo Muwasa imeokoa shilingi milioni 55 ambazo zitatumika kwa shughuli nyingine za uendeshaji wa mamlaka,” anasema.

Mkazi wa kata ya Kamunyonge katika Manispaa ya Musoma, Tatu Kulwa anamshukuru Rais mstaafu Kikwete kutekeleza ahadi yake ya kujenga mradi mkubwa wa maji katika historia ya mji wa Musoma ambao licha ya kuwa kando ya Ziwa Viktoria umekuwa na changamoto ya maji.

“Pamoja na Muwasa kuboresha huduma zake za usambazaji wa maji katika mji wetu, mradi wa Bukanga ndio unaenda kuwa mwarobaini wa kero ya maji yaliyokuwa yakisumbua hasa kata za pembezoni mwa Manispaa ya Musoma kama vile Bweri, Rwamlimi, Nyakato, Kigera, Kwangwa, Buhare na Nyamatare,” anasema.

Mwenyekiti wa Chama Cha Mapinduzi mkoani Mara Christopher Sanya anatoa kwa hatua iliyofikiwa na kusema anafarijika kuona ilani ya uchaguzi ya chama hicho ya 2010 hadi 2015 inatekelezwa vyema.

Kuhusu mradi wa Nyabehu, Sanya anasema utawanufaisha maelfu ya wananchi wa vijiji 14 ikiwa ni pamoja na wakazi wa halmashauri ya Mji wa Bunda. Vijiji hivyo 14 vyenye wakazi zaidi ya 150,000 vinavyonufaika na mradi huo ni pamoja na Nyabehu, Mwiseni, Buzimbwe, Bulamba, Nyantare, Guta na Kinyambwiga. Vijiji vingine ni Tairo, Migungani, Bunda Stoo, Balili, Nyamakokoto, Manyamanyama na Sazira.